Við fengum þessa flottu sögu senda frá Einari í Söðulsholti sem eignaðist sitt fyrsta afkvæmi undan Hákoni nú á dögunum:

,,Við vorum nú orðin frekar óþreyjufull að bíða eftir öðru folaldi, erum búin að fylgjast vel með merunum síðustu daga og loksins fór að leka mjólk úr Blæju sem áttu samkvæmt sónun að kasta fyrir nokkrum dögum. Við vöktum yfir henni um nóttina en þetta gekk samt óvenju rólega hjá henni því venjulega er þær mjög fljótar af þessu, hún var samt greinilega óróleg og var alltaf að fá öðru hverjir hríðir en lagðist aldrei niður til að rembast og svo bara alltíeinu hætti allt saman og hún fór bara að bíta. Eftir að hafa talað við dýralækni sem komst ekki strax, fór dóri inn í hana og í staðinn fyrir að finna fyrir fótum og snoppu fann hann fyrir bakinu á folaldinu. Má kannski segja að sem betur fer hefur Dóri mikla reynslu af sauðburði og náði að rétta það af og ná löppunum, það verður nú alveg að viðurkennast að við vorum ekkert voða bjartsýn að það væri lifandi.

Enda vorum við ekkert smá glöð þegar við náðum því frá henni og það var lifandi og ekki nóg með það heldur var það geggjað á litinn. Rauðskjóttur hestur, glaseygður á báðum augum og mjög mikið hvítur, bara rauður á eyrunum og milli þeirra, með rauðan blett við sitthvort augað og svo rauðan blett í öðrum náranum. GEGGJAÐ Flottur;) á trúlega eftir að verða mikið baðaður í framtíðinni.;)

Sá stutti var ekki skriðinn á fætur þegar var búið að nefna hann Ófeig en hann er undan 1.verðlauna klárhryssunni Blæju frá Svignaskarði og Hákoni frá Ragnheiðarstöðum.

Heimasíða Söðulsholts www.sodulsholt.is

Þess má geta að Blæja móðir folaldsins ber slettuskjótta genið, er undan Jarli frá Búðardal sem bar genið til hennar...og ekki um að villast að Ófeigur er slettuskjóttur ef litafræðin svíkur ekki. Hins vegar er Hákon að gefa bæði venjulega skjótt og einlitt, amk komin tvö rauð, eitt brúnt og eitt bleikálótt einlitt undan honum.

Við óskum eftir myndum af fleiri Hákonsbörnum...endilega sendið á hrafnar@hrafnar.is

Óskað er eftir að þeir sem eiga pláss á fyrra gangmál komi með hryssur í Flagbjarnarholt sunnudaginn 13. júní nk. á milli kl. 13:00 og 16:00. Ef einhver getur ómögulega komið á þessum tíma má hafa samband við Helgu í Flagbjarnarholti í síma 898-4579 og semja um aðra tímasetningu.

Við afhendingu hryssnanna þarf að láta Helgu vita um eftirfarandi:

Eigandi/umráðamaður hryssu, 
    Símanúmer,
Uppl. um hryssu 
    Nafn og uppruni
    Fæðingarnúmer
    Einstaklingsmerki
Uppl. um folald
    Nafn og uppruni
    Litur
    Faðir
    Einstaklingsmerki

Góð regla er að búið sé að einstaklingsmerkja folöld og gefa hryssunum inn ormalyf auk þess að klippa hófa ef þess er þörf. Hryssur sem koma í girðingu hjá hestinum verða alfarið á ábyrgð umráðamanna þeirra á meðan þær eru í girðingunni. Daglegt eftirlit verður með girðingunni en umráðamönnum hryssu er ekki heimilt að fara um girðinguna á tímabilinu án samráðs við Helgu.

Stefnt er að því að sónarskoða að um 6 viknum liðnum eða um mánaðamót júlí/ágúst.

Aðalfundur Ræktunarfélagsins Hákons verður þann 20. mars nk. kl. 18:00.

Við ætlum að hittast fyrir austan fjall, nánar tiltekið á Hólaborg í Flóa (www.holaborg.is) þar sem við munum skoða Hákon sjálfan.

Eftir það, milli 19:00 og 19:30 höldum við á Kríuna við Glóru (www.krian.is) þar sem við munum setja aðalfund.

Hörður á Kríunni mun vera með heitt á grillinu fyrir svanga, meyrasta lambakjöt (kr. 3200 á manninn), gos, öl og léttvín á barnum (kr. 600).

Sjáumst annan laugardag.

Hákon á aðalfundinum 2009

Þá er gangmálið senn á enda hjá Hákoni. Á þeim fjórum mánuðum sem hann hefur verið notaður, frá 15. maí til 15. september hefur hann komist í tæri við 23 hryssur. Vonir standa til að hann hafi náð að fylja 20 hryssur. Nú þegar hafa 17 hryssur verið staðfestar með fyli. Næstkomandi föstudag 18. september mun Hákon verða tekin úr hryssum og þær sónarskoðaðar. Þrjár hryssur hafa verið hjá honum í hólfinu í Flagbjarnarholti frá síðustu mánaðamótum.

Þeir sem notuðu Hákon í sumar eiga von á reikningi frá félaginu þar sem girðingargjald sumarsins, sónarskoðanir og notkunargjald/aðgangsbeiðni eru innheimt. Stjórnarfundur var haldinn í byrjun september og er fundargerðin kominn inn á Skrár hér til hliðar, smella hér Þar er einnig að finna sýnishorn af nýjum hlutaskírteinum en nú hefur verið stofnað einkahlutafélag, Ræktunarfélagið Hákon ehf. og munu ný hlutaskírteini verða send út á næstu vikum. Einnig hefur hluthafaskráin verið uppfærð.

Fleiri myndir frá sumrinu eru komnar inn í myndaalbúmið, smella á myndaalbúm.

Mjög vel hefur gengið með Hákon í hólfi í Flagbjarnarholti. Hann er mjög léttbyggður og ekki holdsækinn en er hinsvegar í frábæru standi nú, er frekar feitur en hitt. Hann hegðar sér mjög prúðlega í hólfinu, heldur hryssunum vel saman en er ekki á miklum hlaupum eða djöflagangi í hryssunum. 

Alls hafa um 18 hryssur heimsótt hann í Flagbjarnarholti. Hann synjaði einni hryssu inngöngu í hópinn sinn og var sú hryssa tekin frá. Hryssueigandinn bætti annarri hryssu í staðinn sem Hákon tók vel við.  

Alls voru 11 hryssur hjá honum allt fyrra gangmálið. Við sónarskoðun þann 21. júlí síðastliðinn voru 7 hryssur staðfestar fylfullar. Ennfremur voru tvær aðrar sem voru líklega fylfullar en ekki var hægt að staðfesta fylin sökum hversu ung þau voru. Þær hryssur voru því látnar ganga áfram með Hákoni og nokkrum bætt við.

Áður hafði verið búið að staðfesta fyl í tveimur hryssum af húsmáli.

Nú eru hjá Hákoni um 12 hryssur og verður sónarskoðað aftur í byrjun september.

Gígja Einarsdóttir ljósmyndari átti leið hjá um Holtin í sumar og tók nokkrar fallegar myndir af Hákoni með stóðmerum sínum.
NÝJAR MYNDIR Í MYNDAALBÚMINU. Smellið á það hér til vinstri.

Hákon kom á Blesastaði mánudaginn 11. maí síðastliðinn. Strax fyrsta daginn var komin hryssa eins hluthafans, í mígandi látum. Hákon lét eins og hann hefði aldrei gert annað og hafði Magnús Trausti orð á því hve öruggur hann væri í kringum hryssu og gengi hreint til verks.

Í myndaalbúminu "Hákon missir sveindóminn" eru myndir frá Blesastöðum, sumar ekki fyrir viðkvæma. Þess má geta að það er auglýst eftir sjálboðaliðum í sumar, vopnaða sólaráburði, til að bera á djásnin á Hákoni þegar sólin skín sem skærast. Endilega bendið okkur á einhverja góða ;-)